Drei Stund‘

In Brusel gibt’s e Gfängnis mit viel Justizvollzug.
Un en große Bohnhof, do geht’s los: durch den Kraichgau mim Zug.

In Grobach isch des Bohnhofsgebäude verschmiert und verfalle,
des deed dem großherzogliche Erbauer iwwerhaupt net gfalle.

Vum Michelsberg grießt e weiß Kerchel mit Drache.
Noch Wengerte geht’s unnerm Turmberg zur Sache.

Denn in Dorlach steigt mer um in e gelwi Bahn.
Die S 4 rollt eigentlich prima,
awwer ohne Klo un Klima.

Gretzinge und Berghause gehn innoner iwwer
un sin doch schwer verschiede.
Die oine hen en Tunnel, die annere koin Verkehrsfriede.

Am Jehlinger Buckel pfeift die Bohn, denn es geht nuff.
Im Alteheim am Wössinger Bohnhof sin se hoffentlich gut druff.

In Dürrebüchig isch er gut erhalte
un mer kann wohne im Bohnhof, dem alte.

In Brette steige bsonners viel Leit aus,
die wolle bestimmt zum Melanchthonhaus.

Noch Gelshause gehts wie durch en Hohlweg uf de Schiene.
En Bauerbach liegt de Bohhof praktisch im Griene.

Flehinge isch als Haltepunkt phänomenal,
dort gibt’s e WC fers Fahrpersonal.

Des kloine Zaisehause hot en Dom un Haiser mit Decher.
Un im Bohnhof fillt e Zahnärztin de Zaiseheiser ihr Lecher.

Sulzfeld: do zeige tolle Leit, dass was geht, dass was laaft:
Die Sulzfelder hen nämlich ihrn Bohnhof gekaaft. (Un saniert.)

In Eppinge steigt mer Richtung Heidelberg in die S5 sofort um.
Awwer die Stimm vum KVV bleibt dodriwwer stumm.

Des Kraichgaustadion vun Eppinge liegt e bissl versteckt.
Do wurd mol de HSV im Pokal 74 richdich verschreckt.

Im Elsenzdal jetzt sieht mer viel Eisenbohntradition,
zum Beispiel an de stillglegte Zuckerriwe-Verladestation.

Mer fährt durch Riche, Ittlinge und Reihe.
Nur wenig Leit drängts do ins Freie.

In Steinsfurt gibt’s Umsteigemelichkeit un e Brieftaube-Eisatzstell.
Sowie die Jupiter Brauerei, do geht e Bier wie e Brieftaub so schnell.

Donn kummt mer nach Sinse, Haltpunkt Museum-Arena.
Vun dort kennscht in dem Concordflugzeig verweile
oder im Bundesliga-Stadion juble und heile.

In Sinse hen sie ihr Station zum Hauptbohnhof ernonnt,
die Idee isch in Brusl noch net bekonnt.

Dann widder en kloine Ort, doch wie beriehmt isch er:
Hoffe isch net schee, hot awwer die TSG.
Un beim Bohnfahre merkt sogar der Laie,
dass er stimmt der alte Spruch – Vun Hoffe isch net weit nach Reie.

In Zuzehause wurd de Bonhof saniert,
un mit de Hoffe-Profis trainiert.
Do trainere die Hoffe-profis, awwer mim Zug kummt selte oiner.

Meckese: Umsteige noch Aglaschterhause.
Wo liegt denn des? Ich glab, des loss ich jetzt sause.

Meckese, umsteige nach Aglasterhause
Dodriwwer isch extra mol die Eisenbohn nach Mosbach gebaut worre,
un erschtmol net durchs Neckardal
domit die Hesse net vun de badische Eisebohn profidiere

En Mensch, der nur en Schädel war, mecht die Forscher schlauer.
Un gfunne hen se den Homo Heidelbergensis do in Mauer.
(Des schee Cafe im Bahnhof isch hoffentlich vun Dauer.)

Die Bammetäler, die mim Zug fahre, die hens gut.
Weil er dort und korz vorher in Reilse noch halte dud.

In Neckargmind verliert sich de Elsenz ihr Spur.
Un de Kraichgau isch a am End, awwer net unser Tour.

Heidelberg: De Bohnhof-Karlstor, heißt schun lang nimmi so.
Sonnern Altstadt, des mecht halt die Tourischte froh.

In Heidelbergs hässlichem Bosteig vum Hauptbahnhof
brauchsch net viel Dusel,
um en Zug zu erwische in Richdung Brusl.

In Kerche-Rohrbach schlürft mer gern Minestrone
am Bahnhof, im Ristorante Stazione.
Jetzt kumme noch meh Doppelname-Statione:
St. Ilge-Sandhause, Wiesloch-Walldorf, Rot-Malsch und Bad Schönborn-Krone

In Mengelse rechts die Bagger vun Terex Fuchs und des Kislauer Schloss.
Gebauts worre ischs fer de Hugo von Schönborn un sein Tross.

Vun Langebricke, des als negschdes kummt,
hot sein Nochfolger Hutten des Schwefelwasser nach Kislau gebumbt.

In Steffeld hält die Eisebohn noch net, also koi Leit versommelt.
In Ubstadt-Weiher isch de Bohhof mol widder voll vergommelt.

Vorbei an de Milldeponie, Gfängnis und Schlossgarde
Dann dud uns des Ziel, Brusl-Hauptbohnof, erwarde.

Drei Stund brauchsch minimum fer die groß Kraichgau-Tour.
Wenn zwischedurch net aussteigsch, sonnern umsteigsch nur.